قاتىسۋشىلارعا ارنالعان العى سوزىندە ق.ء مامي اتاپ وتكەندەي, قازاقستاندا جاس عالىمداردىڭ حالىقارالىق فورۋمىن وتكىزۋ جاقسى داستۇرگە اينالدى. ول عىلىم, ءبىلىم بەرۋ جانە يننوۆاتسيالار سالاسىنداعى وزەكتى ماسەلەلەردى تالقىلاۋ بويىنشا بەدەلدى پىكىرتالاس الاڭى بولىپ وتىر. وسى جىلى فورۋم ەرەكشە ماڭىزعا يە, ويتكەنى قازاقستاندا جاستار جىلى اياسىندا ۇيىمداستىرىلعان.
سپيكەر رەسپۋبليكانىڭ تۇڭعىش پرەزيدەنتى – ەلباسى ن.ءا. نازارباەۆ باستاما جاساعان, قازاقستاندىقتاردىڭ جاس بۋىنىنا شەتەلدە جوعارى ءبىلىم الۋعا بىرەگەي مۇمكىندىك بەرەتىن «بولاشاق» ستيپەندياسىنىڭ ماڭىزدىلىعىن اتاپ ءوتتى. ونىڭ ايتۋىنشا, قارقىندى دامۋ مەن زاماناۋي سىن-قاتەرلەر قوعام مەن مەملەكەت الدىندا جاڭا مىندەتتەر قويادى. بۇل پروتسەستە ساياسي-قۇقىقتىق, ەكونوميكالىق جانە مادەني-گۋمانيتارلىق سالالار ەۆوليۋتسياسىنىڭ ۆەكتورلارىن ايقىندايتىن كونستيتۋتسيا ماڭىزدى ءرول اتقارادى. عىلىمي زەرتتەۋلەردىڭ ناتيجەلەرى كونستيتۋتسيادا بەكىتىلگەن جالپى ادامزاتتىق قۇندىلىقتاردى جۇزەگە اسىرۋعا قىزمەت ەتۋى ءتيىس, - دەدى كونستيتۋتسيالىق كەڭەستىڭ توراعاسى.
12 ەلدىڭ جاس عالىمدارى الدىندا ءسوز سويلەۋ بارىسىندا ق.ء مامي اباي قۇنانباەۆتىڭ 175 جىلدىعىنا ارنالعان ەستافەتانى جالعاستىرىپ, ۇلى اقىننىڭ 38-ءشى قارا سوزىنەن ءۇزىندى كەلتىردى. وندا «اۋەلى ادامنىڭ ادامدىعى اقىل, عىلىم دەگەن نارسەلەرمەنەن. قاشان ءبىر بالا عىلىم, ءبىلىمدى ماحابباتپەنەن كوكسەرلىك بولسا, سوندا عانا ونىڭ اتى ادام بولادى. مال, ماقتان, عيززات-قۇرمەت ادامدى ءوزى ىزدەپ تاپسا, ادامدىقتى بۇزبايدى ءھام كورىك بولادى. حاكىمدەر ۇيقى, تىنىشتىق, اۋەس-قىزىقتىڭ ءبارىن قويىپ, ادام بالاسىنا پايدالى ءىس شىعارماقلىعىنا, ياعني ادام بالاسىنىڭ اقىل-پىكىرىن ۇستارتىپ, حاق پەنەن باتىلدىقتى ايىرماقتى ۇيرەتكەندىگى, ءبىزدىڭ ولارعا مىندەتكەرلىگىمىزگە داۋ جوق.», دەلىنگەن. وسى اسىل مۇرانى تىلگە تيەك ەتە وتىرىپ, جاستاردىڭ بارلىق ىزدەنىستەرىنە ساتتىلىك تىلەدى.
